Maskin pirme nga ginapadumdum it mga awtoridad ro pagdahan kontrra sa COVID-19, pirme man raya nga gina-eabag it mga kandidato ag andang mga tagasuporta.
Maskin ginahambae nga bawae ro haru, paghakus ag paglamano, gina-obra sa gihapon.
Rason nga nagapanawagan eon man ro Department of Health (DOH) sa mga kandidato nga maging mayad nga ehemplo sa publiko.
Nagapabilin sa gihapon ro paeag it COVID sa nasyon ag sa kamatuoran hay naga-grabe pa ro mga kaso kara sa nagkaeain-eain nga parte it kalibutan.
Raya ro rason kon ham-an dapat nga magpabilin ro kada isaea sa pagsunod sa mga ginapatuman nga protocols.
Ro tamang pagsuksok it face mask hay mabahoe nga bulig eabi eon sa pag-agto sa mga campaign sorties.
Umarangkada eon man ro kampanya para sa lokal nga posisyon.
Mabudlay gid man nga mapugngan ro mga violators.
Rason nga ro ginahinyu sa mga kandidato nga magsunod sa mga patakaran eabi pa ag sanda ro masunod ukon magapabilin nga lider it pumueuyu.
Kabay nga kanda maga-umpisa ro pagiging mayad nga halimbawa.
Dapat nga makita kanda ro pagsunod sa mga sueundanan ag bukon it sanda pa ro pasimuno sa pagiging pasaway.
Apang kon pabaya ag owa eon it masaligan nga disiplina, dapat eon nga maghueag ro DOH ag maging ro Commission on Elections (Comelec).
Tumuron ro mga pasaway nga kandidato ag sampulan.
Kun kinahangean nga ipakita ro mga gina-obrang pag-eabag hay obrahon eon.
Indi eon naton ipasa sa publiko ro hilimuon nga kunta ro mga natungdan ro naga-obra eabi pa ag hayagan sa mga video ag litrato ro andang mga pag-eabag bilang ebidensiya.
