KALIBO, Aklan—Sa pihak it naging desisyon it pilang ka mga Local Government Unit ukon LGU nga temporaryong ipasarado anay ro mga sementeryo sa adlaw it “undas” ukon piyesta minatay, bukas ro mga kapelya sa banwa it Kalibo agud dumdumon ro kaeag it mga nagtaliwan eun.
Suno kay Fr. Tudd Belandres it Saint Jhon the Baptist Cathedral Church nga padayun ro andang pag-engganyo sa publiko nga indi sa gihapon magkalipat sa pagpangamuyo para sa andang pamilya nga namatay eun.
Ginpasiguro man kara nga ro simbahan hay padayun nga magabulig sa pagpangamuyo para sa tanan nga mga kaeag.
Kasunod kara, magapatigayon man it misa sa mga kapelya ag imbes nga magpadueong sa mga sementeryo hay mas mayad suno pa kana nga mag-atender eun lang it misa.
Kung pasugtan, posible man sigon nga sanda mismo ro magabisita sa sementeryo sa petsa 2 it nobyembre agud mabendisyunan ro mga namatay eun.
Samtang, ginpasiguro man it simbahan nga andang pagasundon ro tanan nga mga protocol it gobyerno samtang nagahiwat it santos nga misa.
