KALIBO, Aklan—Nagaeaum ro ap-at ka mga kabarangayan nga nagakonekta sa provincial road nga sakop it Brgy. Ugsod, Banga nga maaksyunan eon ro problema sa andang karsada.
Suno kay Punong Barangay Riza Relojo it Brgy. Cupang, Banga nga sigidas ro andang pagpadaea it request sa opisina ni Aklan Governor Florencio Miraflores para masolusyonan eon ro mga eubak-eubak sa daeanon nga andang nasakupan.
Suno kana tatlong beses nga ginpaagyan it grader it Provincial Engineering Office (PEO) ko nagtaliwan nga dag-on ro natungdan nga karsada apang bangud sa sigidas nga pag-uean ag pag-agi it mga mabahoe nga saeakyan rason nga nagahumok ro eugta ag nagaresulta it mga pothole.
Haeos daywang beses sigon sa sang buean imaw nga naga-follow up sa PEO.
Masami sigon nga ginasabat kana it taeatapan nga naka-line up eon ro proyekto apang hasta sa makaron hay owa gihapon raya maubra.
Aminado man ro opisyal nga mabahoe nga perwisyo sa mga pumueoyo ag motorista ro eubak-eubak nga karsada bangud nagiging mabudlay ro transportasyon.
Nasayuran nga nagbaeay it sangka joint resolution ro mga kapitanes it Brgy. Bacan, Cerrudo, Cupang ag Ugsod para uman nga ipadaea sa taeatapan it gobyerno probinsyal.
