KALIBO, Aklan—Hugot ro pagbantay makarun it mga katapo it otoridad agud nga masigurong nagasunod ro mga pomoeuyo sa ginapatuman nga sugical lockdown sa dyawang zone it Barangay Balabag sa isla it Boracay.
Suno kay P/Maj Don Dicksie de Dios it Malay Pnp nga nagbilog ro pwersa it Philippine Coast Guard, beach guard, Malay PNP ag 2nd Mobile Company it Aklan police Provincial Office (APPO) agud masiguro nga owa it maga-eabag sa ginapatuman nga lockdown sa lugar matapos makalista it magkasunod na kaso it coronavirus disease ukon Covid-19.
Madumduman nga nauna eun nga ginpahayag ni Malay Mayor Frolibar Bautista nga sandig sa rekomendasyon ng Malay Inter Agency Task Force Against Covid-19 hay nagpagguwa imaw it Executive Order No. 021 kung siin igapaidaeum ro Zone 5 ag 6 sa mas hugot nga restrictions umpisa Marso 28 hasta Abril 10 it presenteng dag-on.
Samtang kapin man 31 nga DOT-accreditted accommodation establishment nga ginakaeakipan it mga hotels ag resorts ro apektado it surgical lockdown. Nasayuran nga kinahangean sa gihapon nga magpakita it booking document maghalin sa accommodotion establishment, QR codes ag Negative RT PCR result ukon saliva based RT-PCR result ro mga turista antes pasugtan nga makasueod sa isla it Boracay.
Samtang ginpahayag man ni P/Maj. Don Dicksie de Dios , hepe it Malay Pnp, nga magapasa sanda it rekomendasyon sa Malay IATF nga igabawae anay ro pagpatigayon it misa kasunod it selebrasyon it Semana Santa ukon Holy Week.
Mas mayad man suno pa kana nga sa online eamang ro mga misa agud nga malikawan ro pagtaeapnan it deadly virus.
Apang raya hay nakadepende pa sa magiging desisyon it Malay IATF.
