Nagapadayon ro monitoring it Municipal Disaster Risk Reduction Management Office ukon MDRRMO sa mga kasubaan nga sakop it banwa it Libacao.
Raya hay kasunod sa pagbuhos it uean tuga it paghatak it Habagat ni Bagyong Betty.
Suno kay MDRRMO Libacao head Leslie Zambrona, uwa gid haeos nagtaas ro tubi sa andang mga kasubaan.
Apang, nagpadumdom raya sa mga pumueoyo nga maging alerto ag magpamatyag sa daeagan it panyempo.
Ginlaygayan nana ro publiko nga mag-andam eabi eon ro mga naga-istar sa mga mabukid nga porsyon it kabaryuhan nga prone sa landslide ag sa mga low lying areas nga prone man sa pagbaha.
Inde suno kana dapat nga magpakampante eabi eon kon makarundaya ro daeagan it panyempo agud nga mapabilin nga eowas ro kaugalingon ag bilog nga pamilya.
