KALIBO, Aklan — Mabahoe nga bulig sa mga katutubo sa isla it Boracay ro plano it Department of Agriculture nga himuong agri-tourism site ro andang Ati community sa uman nga pagbukas it isla.
Suno sa Boracay Ati Tribal Organization (BATO), nalipay sigon sanda sa manaming balitang daea ni DA Secretary Emmanuel Piñol sa anang pagbisita sa Boracay ku nagtaliwan nga dominggo.
Nasayuran nga naga abot sa P2-million ro gin taeanang pondo it DA para sa financial assistance nga gin tao sa haeos 45 nga miyembro it BATO, kamana man sa mga miyembro it Boracay Women Producers Cooperative ag mga mangingisda sa isla.
Base sa plano, ro kaparte it daywang ektaryang komunidad it mga katutubo hay paga himuong agri-tourism destination nga paga tamnan it mga tinuean-on gamit ro solar-powered greenhouse ag maga alaga it ginatas nga kanding.
Mag eowas kara, magatukod man it organic restaurant ag tribal-inspired hostel sa nasambitang lugar.
Ro tikang hay base sigon sa mandu ni Pangueong Rodrigo Duterte nga ibalik ro Boracay sa mga katutubo.
