Nagpatigayon it rally ro mga miyembro it Ati community sa Isla it Boracay kontra sa gina-alegar nga pagkansela it andang Certificate of Land Ownership Award ukon CLOA.
Nagpanindugan ro mga miyembro it Boracay Ati Tribal Organization (BATO) sa andang ginlunsar nga protesta sa atubang it Department of Agrarian Reform ukon DAR sa banwa it Kalibo nga illegal ro kanselasyon it CLOA nga ginpanupod kanda ni dating President Rodrigo Duterte.
Ro martsa hay nag-umpisa sa Kalibo Cathedral paagto sa DAR Provincial Office nga nagatuyo nga pamaeabagan ro pagbawi sa andang mga ancestral land titles nga nahamtang sa Barangay Manoc-Manoc ag ro kan-o eamang nga hana nga pagpahalin kanda sa andang komunidad sa Boracay.
Suno kay Grace Quimpo, retired employee it DAR nga suportado nana ro kawsa it mga katutubong ati sa Boracay.
Partikular sigon nanda nga ginapakigsukoe ro gin paguwa nga mandu it taeatapan ko Enero 2024 nga nagabawi sa andang CLOAs nga nagtau kanda it kinamatarung sa eugta nga andang ginatamnan ag ginaboe-an it pangabuhian sa makaron.
Ginareklamo man nanda ro pagpang-harass kanda it mga “blue guards” nga nagapugong kanda nga makasueod sa andang propiyedad kamana man ro kawad-an it pormal nga eviction notice.
Madumduman nga mabuhay eon nga ginapakigsukoe it mga katutubong residente it Boracay ro kinamatarung agud nga mapabilin kanda ro andang haeos 2.1-ektaryang ancestral land nga pilit nga gina-aku it mga private land developer.
Kasama sa protesta ro mga lider it Ati community ag iba pang nagasuportang grupo nga nagatuyo nga mapabilin ro andang kinamatarung sa eugta.
