KALIBO, Aklan — Sa pihak nga naga pasaeamat, may kahadluk sa gihapon nga nababatyagan ro mga katutubong Ati sa gina tao kanda nga eugta it gobyerno sa idaeum it land reform program sa isla it Boracay.
Suno sa pilang miyembro it Boracay Ati Tribal Organization (BATO) nga basi maging mitsa pa raya it andang kabuhi.
Hasta sa makaron sigon hay nakabatyag sa gihapon sanda it trauma sa pagbaril-patay sa andang dating spokesman nga si Dexter Condez bangud sa land dispute.
Si Condez hay binaril ku Pebrero 22, 2013 samtang naga pauli sa andang Ati village sa Brgy. Manocmanoc pagkatapos nga magtambong sa sangka pueong.
Nasayuran nga gina pakigsukoe ni Condez ro andang kinamatarung sa gina agawang 2.1 nga ektarya it beach front property nga gina tindugan sa makaron it andang mga baeay nga gin tao kanda it gobyerno ku 2011 pinaagi sa certificate of ancestral domain title nga gin pagowa it National Commission on Indigenous Peoples (NCIP).
Ro gwardiya it Crown Regency Boracay Resort nga si Daniel Celestino ro gina turong suspek sa pagpatay nga gin kulong ku Marso 2014 sa Bureau of Jail Management and Penology (BJMP)-Aklan.
Apang, padayun ro pagpamalibad kara sa krimen.
