KALIBO, Aklan—Ginatun-an pa it mga lokal nga gobyerno ro mga tikang sa pagbukas it mga lisensiyadong bueangan sa probinsiya it Aklan.
Raya matapos nga ginpasugtan eon it National Inter-Agency Task Force ro pagpatigayon it mga bueang sa mga lugar nga una sa idaeum it Modified General Community Quarantine (MGCQ).
Suno kay Ibajay Mayor ag League of the Municipalities of the Philippines ukon LMP-Aklan chapter president Jo-en Miraflores nga pagahueaton nanda ro pagpatuman kara sa iba nga mga probinsiya agud nga makabo-oe it ideya kon paalin ro andang implementasyon partikular ro mga kinahangeanon nga measure agud nga masiguro ro proteksyon it mga sabungero samtang sa sueod it mga bueangan.
Gusto sigon nanda nga uniform ro implementasyon kara sa Aklan.
Bukon suno kana it specific ro mga patakaran rason nga posibleng magapaguwa pa it implementing guidelines ro DILG kamana man ro igapaguwa nga executive order it kada local chief executive angot kara.
Maskin sigon nga ginpasugtan ro operasyon it mga licensed cockpit, apang bawae ro mga tumaean-aw ukon audience nga nagataya.
Ro puwede eamang sa sueod it bueangan hay ro mga naga-buyot it mga igabueang nga mga manok.
Tuyo sigon kara nga hugut sa gihapon nga mapatuman ro instriktong pag obserba it health ag safety protocols
Ginaduso it pilang mga probinsiya ro plano nga pasugtan ro 50 porsiyento nga audience agud nga masunod ro physical distancing.
