Kalibo Aklan ——–Haom eun ro mga Local Government Unit (LGU) engkasong ipasaka ro quarantine classification it probinsiya it Aklan sa Modified Enhanced Community Quarantine (MECQ) maghalin sa General Community Quarantine (GCQ) with hightened restrictions.
Suno kay Ibajay Mayor ag League of the Municipalities of the Philippines (LMP) -Aklan Chapter President Jo-en Miraflores nga kaparte it andang gin-istoryahan sa ginpatigayon nga hinun-anon kahapon it Provincial Inter-agency task force ag mga Municipal Mayors ro mga pagahimuon nga preparasyon engkasong uman nga maibalik ro sa sigon hay “worst case scenario”.
Aminado man raya nga hasta makarun hay padayun sa gihapon ro paglobo it mga kaso it mga nahawaan it coronavirus disease (COVID-19) sa pihak it mga ginapatuman nga restrictions sa probinsiya.
Sa pihak kara, nagaeaum sigon sanda nga mataw-an pa it tiyansa it national IATF ro provincial IATF agud ipabilin anay sa GCQ .
Raya hay agud owa eun sigon it maabo pang maapektuhan mas kapin ro mga trabahador nga posibleng maduea-an euman it trabaho.
Sa makarun hay nagahueat eun lang sigon sanda sa magiging desisyon it national IATF.
