KALIBO, Aklan–Ginabawae anay it lokal nga gobyerno it Malay ro mga live shows, banda ag iba pang klase it live entertainment sa Boracay bangud sa paeag it Coronavirus Disease 2019 (COVID-19).
Base sa ginpaguwa nga abiso it LGU-Malay, ginapasugtan nga mag-operate ro mga restaurants ag food park, apang owa anay it live entertainment.
Magapatigayon it random inspection ro mga awtoridad agud nga masigurong owa it nagapatigayon it mass gathering ag hugut nga ginasunod ro health and safety protocols.
Nauna kara, ginpahayag ni punong barangay Jayson Yap Talapian it Balabag, Boracay nga sangka guest halin sa Metro Manila nga positibo sa COVID-19 ro naki-party sa isla.
Natapnan kara ro pila sa anang mga high-risk contacts.
Ginasugid nga nakabalik eon sa Manila ro guest kat masayuran nga nag-positibo raya sa sakit.
Magadepende sigon sa magiging sitwasyon kun pagapawigon pa ni Malay Mayor Frolibar Bautista pagkatapos it Abril 10 ro lockdown nga nag-umpisa ko Marso 28 sa Zone 5 ag 6 sa nasambit nga barangay, kun sa siin apektado kara ro 31 nga hotels.
Ginkumpirma it Malay Municipal Health Office ro pag-angkon it 25 nga kaso it COVID-19 sa gin-lockdown nga lugar.
Presenteng naka facility quarantine sa Kalibo ro mga pasyente samtang nagapadayun pa ro contact tracing sa iba pang nakiparty.
