KALIBO, Aklan—Ginpadumdom ni Kalibo sangguniang bayan member Augosto Tolentino, Chairman, Committee on Senior Citizen and PWD ro mga younger generation nga taw-an it importansya ag pagpahalaga ro andang mga lolo ag lola.
Raya hay kasunod it selebrasyon it grandparents day makaron nga adlaw it dominggo.
Suno kana, dapat ipakita sa mga katigueangan kon paano sanda palanggaon.
Raya man nga adlaw hay bilang pagta-o it kadungganan sa mga lolo ag lola kamana man pagpadumdom sa tanan nga inde sanda pagkalipatan bangud sa maabong kontribusyon nga andang ginapakigbahin sa komunidad ag sa tagsa-tagsa ka kaugalingon sa andang mga apo.
Ro selebrasyon hay pagta-o man it importansya ag pagkilaea sa magueang nga miyembro it pamilya nga nagata-o it mga pag giya ag laygay halin sa andang mga eksperyensya sa kabuhi.
Maabong nasyon kaibahan ro Pilipinas ro nagaselebrar kara agud nga dayawon ro mga lolo ag lola.
Nasayuran nga bilang pagta-o it importansya it gobyerno, ginakilaea ro mga lolo ag lola sa ginpalig-on ag ginpatuman nga Republic Act No. 7432 ukon SENIOR CITIZENS ACT.
Ro author kara hay si dating Senador Edgardo Angara.
Sa nasambit nga laye, ro mga lola ag lola hay ginataw-an it 20% discount sa bueong, libangan, transportasyon, medical ag dental services sa mga ospital ag maging sa mga restaurant ag fast food chain.
