KALIBO, Aklan—Malabo pa nga maka-uli sa probinsiya it Aklan ro mga locally stranded individuals ukon LSI’s.
Suno kay Provincial Administrator Atty. Selwyn Ibaretta nga ro mandu hay sandig sa direktiba it mga Local Government Units ukon LGU’s bilang kaparte it pagdahan kontra sa COVID-19.
Gin-aprubahan sigon it Provincial Inter-Agency Task Force against Covid 19 ro request it nasambit nga mga LGU’s nga temporaryong suspindehon ro pagpa-uli sa mga LSI’s bangud nga haeos punuan eon ro andang mga ligtas covid center kamana man ro quarantine facilities it probinsiya.
Mag-eowas kara, padayun man ro pagtinaas it kaso it deadly virus sa Aklan, kun sa siin hay nakalista eon it kauna-unahan nga kaso it local transmission.
Bangud kara, nag-ayo man sigon ro mga frontline health workers nga matutukan anay ro nagatinaas nga kaso it sakit sa probinsiya.
Madumduman maskin nga ginpasugtan eon it Bacolod ag Roxas ro pagbaton it andang LSIs, apang nagpaguwa it direktiba si Aklan Gov. Florencio Miraflores ko Setyembre 8 nga indi anay magabaton it LSI’s nga maga-uli sa Aklan.
Ginabawae man kara ro pag-agi sa probinsiya it mga LSI’s nga naga-uli sa iba pang parte it Western Visayas.
Samtang, ro guidelines sigon sa pag transport it mga returning overseas workers ukon ROFs hay owa it anuman nga pagbag-o rason nga bukon it apektado ro andang pag-uli.
Nauna eon nga nagpanindugan ro Regional Inter-Agency Task Force COVID-19 nga igapatuman nanda ro guideline it IATF nga may petsang Agosto 19, nga indi eon iga-require ro re-testing para sa ROF’s nga nauna eon nga nag negatibo sa real-time reverse transcription polymerase chain reaction (RT-PCR) test ag naka-kompleto it 14-diyas nga quarantine sa Manila ukon Cebu antes ginpasugtan nga maka-uli sa probinsiya.
Pagahimuon eamang sigon ro uman nga pag-test kon magpakita it sintomas it sakit.
