Nagpanumpa eon si Ferdinand Marcos Jr. bilang ika-17 presidente it Pilipinas.
Sa anang diskurso, ginhinyu nana ro pagbuylog it mga Pilipino agud nga maangkon ro kadaeag-an.
Suno kana nga magabangon it uman bangud sa pagbuylog ag pagbueuligan.
Ro pageaum it pumueuyu hay ana man nga pageaum ag ro pageaum hay para sa buwasdamlag it mga inunga.
Indi sigon mapas-eawan ro mga nagsalig kana.
Magaserbisyo sigon imaw ag haum nga atubangon ro mga hangkat sa pagpanerbisyo.
Mga mabug-at ro hangkat nga paga-atubangon ni Marcos sa pag-umpisa it anang termino.
Ensakto sa anang pagpungko hay ro padayun nga pagtaas it mga baeak-eon , pagtaas it pamasahe ag ro indi mapugngan nga price increase.
Sa Martes, ginaeauman eon man ro pagtaas it diesel ag gasoline nga panibag-ong paeas-anon eon man it mga motorista.
Padayun ro pagnaba it piso kontra sa dollar nga sa makaron hay naga-abot eon sa P55 pesos ro kada sang dolyar.
Ro pagnaba it balor it piso hay naga-ugat man sa pagtaas it presyo it langis.
Mabahoe nga hangkat man kay Marcos ro pandemya nga sa makaron hay owa pa eubusan nga nagatapos .
Sambilog pa sa ginakabig nga mabahoe nga hangkat sa administrasyong Marcos ro padayun nga pagpang-bully it China sa West Philippine Sea.
Ginhambae ni Marcos nga indi imaw magapasugot nga makatapak ro sin-o man sa ginapanag-iyahan it Pilipnas.
Igapakigsukoe sigon nana ro soberanya it nasyon.
Mabug-at ro mga paga-atubangon nga hangkat.
Pamatud-an ni Marcos nga masarangan nana raya nga atubangon.
Pamatud-an man nana nga saea ro mga ginahambae it mga naga kontra kana.
Kon mahimo nana , maduea ro mga pagduha-duha.
