KALIBO, Aklan—Ginaeauman nga madugangan pa ro mga naka-deploy nga mga pulis sa banwa it Kalibo agud nga masiguro ro kaeowasan it publiko sa ginapatigayon nga Sto. Niño Ati-Atihan Festival 2023.
Suno kay P/Cpl. Leonilyn Artes, tagapaghambae it Aklan Police Provincial Office ukon APPO nga ko Enero 8 hay nag-aeabutan eon ro augmentation forces halin sa Police Regional Office ukon PRO-6 ag iba pang mga police provincial offices halin sa Western Visayas.
Ro Ati-Atihan festival nga ginaselebrar kada ikatlong domingo it Enero agud nga taw-an it pasidungog ro Batang Hesus hay nag-umpisa ko Lunes ag magatapos sa domingo nga adlaw, Enero 15.
Ginpahayag pa ni Cpl. Artes nga may gintaeana man sanda nga screening areas pasueod sa festival zone ag iba pang lugar nga ginahiwatan it events.
Nauna eon nga ginpasiguro it PRO-6 nga owa sanda it anuman nga na-monitor nga paeag sa tiempo it festival.
Gindugang pa nga ro force multipliers kapareho it mga barangay tanod, volunteer groups, ag iba pa hay gin-augment para sa security deployment, crowd control ag pagbantay it daeagan it trapiko.
Samtang, ginlaygayan man nana ro mga festival goers nga likawan nga magdaea it mga ginabawae nga bagay kapareho it mga baril ag mataeum nga mga bagay.
