KALIBO, Aklan—Kasado eon ro mga maeagkuang event sa Boracay para sa nagahilapit nga Love Boracay nga dating LaBoracay sa Abril 26 hasta it Mayo 2, 2020.
Suno kay Boracay Inter-Agency Rehabilitation Management Group (BIARMG) general manager Natividad Bernardino, ginkasugtanan it Department of Tourism, Department of Interior and Local Government, LGU-Malay ag stakeholders sa isla nga magpatigayon it uman it Love Boracay agud mapabaskog ro domestic tourism.
Kasunod raya sa pagnaba it haeos 50 porsiyento it international tourist arrivals sa isla bangud sa madasig nga pagkalhit it epidemya it coronavirus disease ukon COVID-19 ag ro travel ban nga ginpatuman it gobyerno sa China ag sa special administrative region kara nga Hong Kong ag Macau kamana man sa North Gyeongsang province kaeakip ro Daegu ag Cheongdo County sa South Korea.
Ro mga Chinese ag Koreans ro nagapangunang source market it Boracay.
Pila sa mga nakalinyadang event suno kana nga patok kada tag-init ro Sabor Boracay ukon food festival, Paraw Regatta, Kite Flying Festival, Water Festival, Toy Boat Racing nga igapatigayon sa ginlimpyuhang lawa ag wetland sa isla, Island Wide Sale ag iba pa.
Ro tema makaron nga dag-on it Love Boracay hay “Rediscover Local, Experience the New Boracay”.
Samtang sa pihak nga parte, ginaeauman nga maabong lokal tourist ro magabisita sa isla sa pagbalik it love boracay maskin mga international tourist nga magahalin sa Northern America, Europa ag iba pang nasyon nga uwa it travel restriction.
Ginpahayag dugang nga mabahoe eon ro epekto it COVID-19 sa sektor it turismo kamana man sa negosyo sa isla.
May mga establishment sigon nga 20 hasta 30 porsyento eon lang ro andang occupancy kamana man ginpapahuway it mga raya ro andang mga casual workers.
