NATIONAL News — Gintigsambilog it Malakanyang ro mga miyembro it gabinete ag iba pang opisyal it gobyerno nga magatambong sa pagpamati it Senate foreign relations committee ni Sen. Imee Marcos angot sa legalidad it pag-aresto kay dating Pangueong Rodrigo “Digong” Roa Duterte.
Ginpahayag ni Presidential Communications Office Undersecretary ag Palace Press Officer Claire Castro sa press briefing sa Malakanyang nga ro una sa listahan it Office of the Executive Secretary nga posibleng magtambong sa nasambit nga hearing hay sanday “Secretary Jesus Crispin Remulla it DOJ; Prosecutor General Richard Anthony Fadullon; ag Chief State Counsel Dennis Arvin Chan.
Nakabutang man sigon sa listahan si Department of Foreign Affairs Secretary Enrique A. Manalo; Philippines Center on Transnational Crime Executive Director Alcantara; PNP General Rommel Francisco Marbil; ag General Nicolas Torre; halin sa DMW, si Secretary Hans Cacdac; kaibanan man si Special Envoy Markus Lacanilao; ag halin sa SEC, Atty. RJ Bernal; ag Atty. Ferdinand Santiago.
Ro pagbag-o sa huyo it hangin halin sa Malakanyang hay bangud man sa pag-respeto it Malakanyang kay President Francis “Chiz” Escudero.
Samtang, pwede man nga maghinyu ro mga magatambong nga opisyal it executive privilege sa ‘question and answer’ sa nasambit nga hearing.
Nauna kara, ginpahayag ni Escudero nga magatambong ro mga miyembro it gabinete ag iba pang opisyal it gobyerno sa pagpamati it komite ni Imee Marcos angot sa legalidad it pag-aresto kay dating pangueong Duterte.
Ginpahayag ni Escudero nga nagdesisyon imaw nga pangunahan ro komunikasyon sa tunga it executive department ag Senado agud nga malikawan ro banggi-anay sa tunga it daywang magka-level nga sanga it gobyerno.
Sa pihak kara, ginpahayag ni Escudero nga ginahinyu it komite ro pagtambong it pilang tawo, kaibahan si PNP-CIDG chief Nicolas Torre nga dapat magtambong sa hearing bilang pinunong opisyal sa pag-aresto kay Duterte ko Marso 11.
Ko Abril 3, gingamit it mga miyembero it gabinete ro executive privilege para indi makatambong sa imbitasyon it Senate foreign relations committee.
