KALIBO, Aklan–Presenteng nagapangatubang sa grabeng kalugian ro mga mangunguma sa tunga it pag-umpisa it harvest season.
Raya hay kasunod it naeksperyensyahan nga sunod-sunod nga pag-uean, pagbaha ag pagtama it bagyo.
Suno kay Gilbert Del Rosario, sangka mangunguma sa Brgy. Pagsanghan, Banga nga kaeabanan sa mga tanom nanda nga paeay hay nagkaeatumba rason nga haeos upa ro guwa it andang ani.
Owa sigon it ginpaeampas ro kalamidad bangud haeos tanan sandang mga mangunguma hay nakabatyag it pagbawas sa andang tubas.
Sambilog pa sigon sa nagapalisod kanda hay ro owa it untat nga pagmahae it abono.
Kadungan kara, nag-apela man imaw it bulig sa natungdan nga ahensya it gobyerno nga mabuligan sanda agud nga maskin paano hay makabawi halin sa pagkalugi.
