NATIONAL News — Magatau ro Department of Education (DepEd) sa mga manugturo it 30 diyas nga flexible vacation agud mapahagan-hagan ro andang trabaho.
Suno kay Education Secretary Sonny Angara, katuyuan it bakasyon nga maka-relax ro mga manugturo ag estudyante kaibahan ro andang pamilya pagkatapos it academic year.
Posibleng maka-avail it andang bakasyon ro mga manugturo umpisa Abril 16 hasta Hunyo 1, 2025, nga pwede nga dere-deretso ukon staggered basis.
Kaibahan sa maka-avail it bakasyon hay ro mga manugturo it Alternative Learning System ag Arabic Language ag Islamic Values Education.
Sa raya nga kahigayunan, ro mga manugturo hay indi kinahangean nga magpasakop sa anuman nga mga hilimuon nga may kaangtanan sa Performance Management Evaluation System (PMES).
Bukon man it mandatory ro mga summer training ag professional development programs.
Kon pilion it mga manugturo nga magtambong, pagataw-an sanda it dugang nga Vacation Service Credits dugang sa 30-diyas nga bakasyon.
Ginklaro man it DepEd nga owa naeakip sa nasambit nga pribilehiyo ro mga school heads bangud kinahangean nanda nga masiguro ro operasyon it eskwelahan sa tiempo it bakasyon.
