KALIBO, Aklan–Nagapabilin nga blangko ro mga manugturo it Jugas Elementary School kung sin-o ro responsable sa pagsueod ag pagpangmalit sa andang mga kagamitan sa sueod it andang mga classroom.
Suno kay Lucila Resco, Grade 1 Teacher it nasambit nga eskwelahan nga ko Lunes it agahon hay nakibot ro anang mga co-teacher matapos makit-an nga nagkalhit eon sa saeog ro kaeabanan sa andang gamit kung siin ginkakas pa it mga suspek ro pilang slide it jelousy.
Maskin sigon ro bakante nanda nga kwarto nga may nakasueod nga importanteng dokumento hay owa man ginpaeampas.
Indi pa sigon nanda matumod kung ano ro mga learning material nga naduea bangud nagapabilin nga intact ro andang gamit kapareho it computer, printer, TV, electric fan ag radyo.
Posible sigon nga kwarta ro gina-usoy it mga suspek rason nga ginpang-ukay nanda ro haeos tanan nga gamit sa sueod it mga kabinet.
Ginapatihan nga sa katung-anan it adlaw it Sabado ukon Dominggo ginsueod ro andang eskwelahan.
Ginpahayag dugang nga ko Dominggo napan-uahan it andang utility nga nagkalhit ro mga basurahan sa guwa apang owa kara masikyar ro kahimtangan it mga classroom.
Ro insidente hay gilayon man nanda nga ginreport sa barangay.
Nagpanawagan man raya sa mga suspek nga makonsensya ag magguwa eon kamana man nga atubangon ro andang ginhimo.
