Makaron nga buean ro deadline it pagbayad it buwis.
Hugut ro naging paandam it Bureau of Internal Revenue (BIR) nga owa eon it extension sa pagbayad it buwis.
Sa Memorandum Order nga ginpaguwa ni BIR Commissioner Ceasar Dulay, ginmanduan nana ro tanan nga mga revenue officers nga pabaskugon ro pagkolekta it buwis.
Suno kay Dulay, kapin sa P252.6 bilyon pesos ro pagakolektahon nga buwis it BIR makaron nga Abril.
Ko 2020, nagtau it palugit ro BIR sa pagbayad it buwis bangud sa pandemya.
Sa baylo nga Abril, gin-obra nga Hunyo ro deadline.
Makaron nga dag-on hay medyu mabahoe sigon ro pagasukton nga buwis ag owa eon it gintau nga palugit.
Manami nga pamatian ro ginhambae it nagadumaea sa BIR.
Kon makolekta tanan, may una nga magamit nga pondo agud nga magastusan ro pagkinahangean it nasyon.
Sa makaron, eumos sa trilyong pisong utang ro Pilipinas nga nagbahoe bangud gingamit sa pandemya ag kun anu-ano pang ginagastusan.
Sa pihak it matsa “ kamay na bakal” nga paandam it BIR, nagapabilin sa gihapon nga napas-eawan ro nasambit nga ahensiya sa pagsukot it buwis.
Sangka halimbawa hay ro bilyones nga utang it Marcos family sa estate tax.
Naga abot eon sa P203 bilyon pesos ro utang it Marcos family.
Indi masayuran kon ham-an nga hasta sa makaron hay owa pa nasukot it BIR ro pamilya Marcos sa kautangan it mga raya.
Bangud sa kapas-eawan it BIR, makaangkon it imbestigasyon ro Senado angot sa lumobong utang it mga Marcos sa buwis.
Kon makolekta ro bilyong pisong utang, maabu ro maayudahan it nasambit nga kantidad eabi pa ag maabu ro naduea-an it trabaho bangud sa pandemya.
Mabahoe raya nga bulig sa mga pigado nga nakaexperiensiya it gutom.
Ro P203 bilyon pesos hay maabu eon nga mahimo agud nga makabangon sa kumunoy ro nasyon.
Ipursigi it BIR ro pag-eagas sa mga may utang sa buwis.
