KALIBO, Aklan—Bawae nga magtambong sa simbang gabi ro mga menor de edad nga ginapatigayon umpisa Disyembre 16 hasta 24, 2020.
Suno kay Police Major Belshazzar Villanoche, hepe it Kalibo Police Station nga pilang mga ginikanan ro andang ginsita matapos nga magbitbit it andang mga unga sa pagtambong sa simbang gabi.
Ginklaru nana nga indi pa pwedeng magguwa ro mga menor de edad bangud sa peligro gihapon nga matapnan sanda it covid 19.
Apang bangud nga paskwa hay puro sita eamang ro andang gin obra ag owa eon nagpapanaog it multa nga P1,000 pesos.
Ginlaygay kara sa mga ginikanan nga maging responsabli ag sanda mismo ro magdahan sa andang mga unga.
Sa pihak nga parte, ginkalipay ni Major Villanoche ro pagdayaw kanda it inspection team it regional internal affairs service ukon RIAS 6 nga ginpangunahan ni P/Lt. Col. Roger James Brillantes ag P/Lt. Jean Panes it PIAS Aklan.
Nakapuntos ro mga tawuhan it Kalibo PNP bangud sa pagsunod sa tamang pagsuksok it uniform, maayos nga custodial facility ag contact tracing office.
Gin-engganyo man it RIAS ro sin-o man nga may reklamo sa mga pasaway nga pulis nga makipag-angot sa andang taeatapan para sa insigidang aksyon.
Nauna kara, gin abisuhan ro kapulisan nga maging alerto makaron nga tiempo it paskwa ag sa nahilapit nga anibersaryo it pagtukod it new peoples army ukon NPA.
