KALIBO, Aklan—Ginatugis makaron it mga mobile legends ukon ML players sa probinsiya it Aklan ro organizer it Hampang Aklan Mobile Legends League Season 1 nga si Manuel Tullo nga tumandok it Roxas City, Capiz.
Si Tullo hay nauna eon nga ginreklamo it mga ML players bangud sa gina-alegar nga scam.
Modus operandi kara nga mag-organisa it pahampang ag naga-engganyo it mga players nga magbilog it team sa kada banwa sa bilog nga Aklan sa promisang ro magakampeon hay magabaton it kapin sa 100,000 pesos.
Apang antes nga makapasakop hay magakolekta it 2,000 pesos kada player bilang registration fee nga ko ulihi hay ginpanabaan sa 1,000 hasta 500 pesos.
Ro bayad sigon nga naga-abot sa haeos 20 to 30,000 pesos hay ginkolekta pinaagi sa Gcash.
Sa makaron hay indi eon nanda ma-contact si Tullo matapos nga gin-delete eon ro anang FB ag page it Slam Esports.
Engkaso nga indi matuman ro anang promisa nga iga-refund ro bayad hay mapilitan sigon sanda nga ipa-blotter sa pulis ro insidente ag magapasaka it kaso.
Sa pihak nga parte, ginpahayag man ni certain Jude it libacao nga owa gin-refund ro andang naunang bayad matapos nga ginpanabaan sa 1,000 pesos ro registration fee kasunod it pag-recruit it maabu nga team.
Halin sa dating 4 teams hay naging 8-teams.
Nag-post sigon sanda it mesahe sa social media agud nga magtau it paandam ag owa eon it ibang mabiktima pa.
Samtang, ginsaysay man it team leader halin sa malay nga si certain Renzo nga ginpilit eamang sanda ni tullo nga unang maghampang ko oktubre 1 maskin nga owa pa sanda nakabayad.
Napilitan man sigon imaw nga mag utang sa annag kabarkada agud nga itau kay Tullo nga nagakinahangean it 6,000 pesos apang 1,000 pesos eamang ro anang naitau.
