KALIBO, Aklan—Haeos 80 porsiyento it mga miyembro it Muslim community sa isla it Boracay ro nagbakwit pauli sa andang probinsiya sa Mindanao bangud sa kawad-an it paeangitan-an sa isla.
Sambilog ro boracay sa mga eubus nga naapektuhan it pandemya umpisa ko buean it pebrero kat magpanaeasa ro coronavirus disease, kun sa siin owa eon it mga turista nga nagasueod sa isla bangud sa ginpatuman nga travel restrictions ag community quarantine measures.
Kaabuan sigon sa mga residente hay nagasalig eon lang sa ayuda halin sa gobyerno ag komunidad.
Ko Oktubre 5, kapin sa 110 nga residenteng Muslim ro ginbuligan it Office of Civil Defense sa Western Visayas nga maka-uli sa Lanao del Norte, Lanao del Sur, ag Misamis Oriental.
Dugang nga masobra sa 100 nga mga residente ro gin-repatriate makataliwan ro daywang domingo.
Halin sa 3,000 nga mga miyembro, kapin sa 500 nga mga residente eon lang ro nabilin sa Muslim community sa Sitio Ambulong sa Barangay Manoc-manoc.
Kapin sa 10 porsiyento kara hay mga unga nga naga-eskwela.
Kaabuan sa mga Muslim hay nagabaligya it mga souvenir items, alahas ag eambong para sa mga turista.
Madumduman nga umpisa ko Hunyo 16 hay ginbuksan ro isla sa mga turista nga naghalin sa Western Visayas ag ko Oktubre 1 hay halin sa iba pang parte it nasyon nga una sa General Community Quarantine ag MGCQ apang manaba pa ro numero it mga nagasueod nga turista kumpara sa 3,000 hasta 5,000 kada adlaw nga mga bisita antes ro pagpanaeasa it pandemya.
