Kalibo Aklan ———–Nag-abot eun sa 227,051 ro nabakunahan kontra sa COVID-19 sa Western Visayas.
Sa interview it Bombo Radyo kay Dr. Bea Natalaray, head it Non-Communicable Disease Sector it Department of Health (DOH) Region VI, ginpahayag kara nga ro nasambit nga numero hay katumbas it 16.38% nga target nga bakunahan sa Rehiyon VI.
49, 756 man kara ro fully vaccinated eun ukon nakabaton eun it first ag second dose it COVID-19 vaccine.
Suno kay Natalaray, sa mga fully vaccinated, 47, 492 kara ro gingamit hay Sinovac brand ag 2, 264 man sa Astrazeneca brand it COVID-19 vaccine.
Ro mga nakabatun man it first ag second dose it COVID-19 vaccines sa Western Visayas hay ginakaeakipan it mga masunod:
Aklan nga may 17,904 ka mga pumueuyo nga nakabaton it first dose ag 3,931 sa second dose;
Antique nga may 16,434 sa first dose ag 4,024 sa second dose;
Bacolod City nga may 25,389 sa first dose ag 5,600 sa second dose;
Capiz nga may 22,847 sa first dose ag 6,242 sa second dose;
Guimaras nga may 6,944 sa first dose ag 1,418 sa second dose;
Iloilo Province nga may 60,531 sa first dose ag 11,751 sa second dose;
Iloilo City nga may 37,279 sa first dose ag 9,390 sa second dose; ag sa Negros Occidental nga may 39,723 sa first dose ag 7,444 sa second dose .
Samtang, ginpahayag ni Natalaray nga ginakolekta ag ginavalidate pa it DOH ro data it mga nagpositibo sa COVID-19 nga nabakunahan eun it first dose ag second dose kontra sa makamaeatay nga virus.
Ginausisa man suno kay Natalaray ro ‘timing’ it pagpositibo it COVID-19 patients kung sa siin ginapamantaw kung baea nakabatyag ro mga raya it sintomas it virus antes nga nagpabakuna.
Ginahuyap man sigon ro adlaw kung san-o natapnan it COVID-19 ro sangka pasyente nga nabakunahan eun agud matumod kung nagdevelop eun ro anti-bodies sa eawas kara maghalin kat nakabaton it bakuna.
Gin-ako man ni Natalaray nga nakabaton eun sanda it mga report nga may nagpositibo sa COVID-19 sa pihak nga nabakunahan eun kontra sa virus apang raya hay subject pa for verification.
