KALIBO, Aklan—Nag-abot eon sa 4 ro numero it mga nadakpan nga naga-eabag sa gun ban may kaangtanan sa Barangay ag Sangguniang Kabataan Elections.
Suno kay Chrispin Raymund Gerardo, tagapaghambae it Commission on Elections ukon Comelec Aklan nga tatlo ro mga nakumpiskang baril ag sambilog ro deadly weapon.
Samtang, gindugang pa kara nga padayun ro pagpatuman it checkpoint operations it PNP agud nga masiguro nga magiging maayos ro pagpatigayon it eleksyon sa nasyon sa Oktubre 30.
Sa pihak nga parte, ginkumpirma ni Gerardo nga puro pagpaandam pa eamang ag owa pa it may nakasuhan sa Aklan angot sa pag-eabag sa premature campaigning.
Suno kana nga may pilang kandidato ro nagadangop sa andang opisina ag responsable nga nagapangutana kon ano ro mga dapat nga obrahon agud nga indi maka-eabag sa campaign rules.
Uman nga ginpadumdum it komisyon nga ro campaign period para sa maabot nga eleksyon hay nakataeana pa sa Oktubre19 hasta 28.
