KALIBO, Aklan —Nagaabot eon sa 84 ro kabilugang numero it mga naaresto sa pag-eabag sa ginapatuman nga ordinansa halin kat ginlunsar ro Project BESST ukon Boracay Enhanced Security Strategy and Tactics sa isla it Boracay.
Base sa record it Malay PNP Boracay sub-station, kaeabanan sa mga pag-eabag hay ro pagpatigayon it mga aktibidad sa beach front, pagbitbit it mga debotelyang ilimnon ag pagpanigarilyo sa beach, kamana man ro pagbaligya it mga paninda ag iba pa.
Ro nasambitang proyekto hay ginlunsar it gintingob nga pwersa it pulisya ag Boracay Inter-Agency Rehabilitation Management Group agud matutukan ro pagkalhit it basura, pagpanigarilyo, mga ambulant vendors, sex workers ag illegal tour guides sa isla.
Katuyuan kara nga maging “Discipline Zoned Boracay” ro isla kaparehas it iba pang mga tourist destination sa nasyon.
