KALIBO, Aklan — Sa nagahilapit nga pagtapos it voters’ registration sa maabot nga Sept. 30, ginpahayag ni Atty. Christian Itulid, election officer IV it Commission on Elections (Comelec)– Kalibo nga dagsa eon ro numero it mga nagahingabot nga mag-file it andang aplikasyon .
Bangud kara, ginsaylo eon sigon nanda ro andang venue halin sa old building it munisipyo it Kalibo paagto sa new building para sa mas maeapad nga lugar.
Laygay pa nana sa mga aspiring voters nga indi eon paghueaton ro last day agud nga malikawan ro mahaba nga pila.
Abiso pa nana nga indi eon magtau ro Comelec it extension para sa voter registration deadline bangud nga paga-asikasuhon eon nanda ro mga maga-file it certificates of candidacy (COC) sa mga magapadaeagan sa maabot nga May 2025 election nga maga-umpisa sa Oktubre 1.
Umpisa ko Lunes hay naga-average eon sanda it 60 hasta 70 nga aplikante ag posible pang magdoble ro nasambit nga numero sa masunod nga mga inadlaw.
Ro Comelec Kalibo hay naka-proseso suno kana it kabilugan nga 1,600 to hasta 1,800 nga applications umpisa nga ginbalik ro voter registration ko Pebrero ag ginaeauman nga magasaka pa sa 2,500 sa pinaka-ulihi nga pagpatigayon it Election Registration Board (ERB) hearing sa Oktubre 14.
Mas maabu sigon makaron ro nagapa-reactivate ag naga-transfer.
Sa pihak nga parte, gindugang pa ni Atty. Itulid nga nagpatigayon man sanda ko nagtaliwan nga adlaw it Simulation Exercise (SIMEX) bilang pagpahaum para sa nagahilapit nga filing it COC.
Owa eon man sigon sanda it plano nga bayluhan ro venue para sa mga maga-file it COC nga igapabilin sa andang opisina sa ground floor it old building it munisipyo it Kalibo.
