KALIBO, Aklan—Nagnaba it haeos 50 porsiyento ro mga nagapakasae sa probinsiya it Aklan umpisa 2015 hasta 2020.
Raya hay base sa datos it Philippine Statistics Authority ukon PSA-Aklan.
Suno kay Mr. Peter Mangilog, Statistician II it PSA-Aklan nga panaba ro trend it mga nagapakasae sa probinsiya.
Halin sa dating 3,147 ko 2015, nagnaba it tig-1,519 sa masunod nga mga dinag-on hasta makaron nga 2020 ukon haeos katunga ro numero it mga nagpakasae.
Sa nasambit nga datus, ro buean it Disyembre ag Mayo ro mas ginapili nga tiempo it mga magkarelasyon it andang pagpakasae ag bukon it kapareho sa nakasanayan nga hunyo rason nga owa eon it ginatawag nga “June bride”.
Mas maabu man ro gustong magpakasae sa banwa it Kalibo, mapa-civil man ukon sa simbahan ro kasaean.
Gindugang pa ni Mangilog nga ginabase nanda ro andang mga datus sa marriage certificate nga ginasumite kanda it magkaeain-eain nga Civil Registrar’s Office it kada lokal nga gobyerno.
