KALIBO, Aklan–Pila sa mga nagapangunang daeanon sa banwa it Kalibo ro ginbaha kaina kasunod it mabaskog nga pagbubo it uean nga may kaibahan nga pagpangilat ag pagpanaeugdog.
Kaibahan sa mga ginbaha hay ro porsyon it Osemeña Avenue ag Jaime Cardinal Sin Avenue.
Raya hay mabuhay eon nga problema nga hasta sa makarun hay owa gihapon masolusyonan.
Masami rayang nagatuga it perwisyo ag kabudlay sa mga naga-agi nga motorista ag pumueoyo kada tyempo it tag-uean.
Sa pihak kara, nagaeaum gihapon ro mga motorista nga mataw-an it igtueopangod kamana man nga maaksyunan eon raya it lokal nga gobyerno it Kalibo, Department of Public Works and Highways (DPWH) ag iba pang natungdan nga ahensya it gobyerno.
Kadungan kara ro apela nga ayuson ro drainage system nga imaw ro ginaturo nga nagapangunang rason it pagbaha sa nasambit nga mga karsada.
