KALIBO, Aklan—Uman nga nag-abu ro mga nagasimba kada domingo sa Kalibo Cathedral kasunod it pagpatuman it alert level 2 sa probinsiya it Aklan.
Raya ro ginpahayag ni Fr. Tudd Belandres it St. John The Baptist Cathedral.
Suno kana nga owa sanda it ginbag-o sa seating arrangements para sa 50% nga capacity sa sueod it simbahan kun sa siin nataeupangdan nanda nga naging disiplinado man ro mga nagasimba ag owa nagadueutdutan.
Ginpahayag dugang nga hugut nanda nga ginapatuman ro health and safety protocols bangud nga nagapabilin gihapon ro covid 19 pandemic partikular ro “no face mask, no entry policy”, pagbo-oe it body temperature, paggamit it alcohol ag ro social distancing.
Samtang, ro ibang misa suno kana hay ginapatigayon sa mga chapel sa kada barangay.
Magapabilin ro Aklan sa alert level 2 hasta sa Nobyembre 30.
Nagpanawagan man si Fr. Tudd sa publiko nga indi magpakampante ag padayun nga magdahan bangud nga nagapabilin ro paeag it deadly virus.
Samtang, ginpadumdum ni Fr. Tudd ro publiko nga indi pagkalipatan ro mga leksyon nga natun-an sa pag-atubang sa pandemya.
Pila sa mga realization sigon makaron nga tiempo hay ro spiritual nga pagpahaum bangud nga matag-od eamang ro kabuhi ag anuman nga oras hay pwede kita nga mamatay.
Kinahangean suno kana nga mag-obra it kamaeayran sa isigkatawo ag pirmeng magpangamuyo agud nga maeampuwasan ro mga ginapangatubang nga kalisod.
