Business News ——Ginpaandaman it Department of Agriculture ro hog growers ag traders nga pwedeng magapangatubang ro mga raya sa kaso kun mapamatud-an nga ginapunggan nanda ro pag-abu it supply it pork products sa mga baealigyaan.
Raya hay matapos nga pataasan it DA ro suggested retail price (SRP) sa pork products matapos magnaba ro supply kara bangud sa African Swine Fever.
Suno sa ahensya, paga-imbestigahan kara kun may mga suppliers ro nagatago it pork products agud nga hueaton nga magtaas ro presyo.
Sa ginpirmahan nga administrative circular ni Secretary William Dar hay nagtaas ro SRP it pork kasim ag pigue sa P260 pesos per kilo halin sa P230 pesos samtang nagsaka man ro presyo it pork liempo halin sa P250 pesos per kilo sa P280 pesos.
Ginpunto pa it Dar nga ro pagkalhit it ASF hay nakaapekto sa supply nga rason man agud nga magtaas ro retail prices it mga baealigyaan sa Metro Manila.
Bangud kara hay ginabaligya makaron ro pork kasim halin sa P300 pesos-P330 pesos kada kilo sa mga baealigyaan samtang ro pork liempo man hay nagahampang sa P320 pesos hasta -P360 pesos kada kilo.
Ginatinguhaan man it DA nga mag-biyahe it live hogs ag frozen carcass, ukon “pork-in-a-box”, halin sa Visayas ag Mindanao para mapa-abu ro supply sa mga baealigyaan sa Metro Manila ag iba pang parte it Luzon.
