Sa pihak it naeksperyensyahan nga kalisod ag kahadlok sa ginhalinan nga war zone nga lugar it Khartoum, Sudan, pursigido gihapon nga balikan ni Bombo International Correspondent Bernard Comia, tubong probinsya it Aklan ro andang mga naaywanan nga propyedad sa nasambit nga lugar.
Si Comia kaibahan ro anang mag-ina hay nakaguwa sa war zone kaibahan ro iba pang mga pinoy ag nagbakwit sa Cairo, Egypt.
Gin-istorya nana nga nagtinguha sanda nga makakontra it bus para eamang makaabot sa border kon sa siin idto naghueat kanda ro opisyal it OWWA ag DFA nga sanda ro nagdaea kanda sa nasyon it Egypt.
Mahaba-haba ro andang naging byahe hasta nga makaabot sa eowas nga lugar kon sa siin pangamuyo ro andang ginkapitan nga makaeampas sa war zone.
Pag-abot sigon sa border hay gin-asikaso sanda it husto it gobyerno it Pilipinas hasta nga naproseso ro andang byahe pauli it Pilipinas.
Ginprayoridad ro mga may edad, kapansanan ag may mga maisot nga inonga.
Angot kara, excited eon sigon sanda nga makauli it Pilipinas ag makadiretso iya sa probinsya it Aklan agud nga makit-an ro andang pamilya nga nagahueat sa andang pag-uli.
Kapin sa 340 mga pinoy sigon ro nabakwit it gobyerno sa Cairo, Egypt ag per batch ro andang pag-uli sa Pilipinas.
