Natigayon eon nga maproklama it Provincial Board of Canvassers ro mga opisyal it probinsya it Aklan sa bag-o eamang natapos nga national and local elections, adlaw it Lunes, Mayo 12, 2025.
Ro proklamasyon hay ginpatigayon sa Sangguniang Panlalawigan Session Hall nga nagsirbi man nga lugar para sa paghuyap it boto nga ginpangunahan ni Provincial Election supervisor Atty. Roberto Salazar.
Ro mga naproklama hay sanday re-elected governor Jose Enrique Miraflores kaibahan ro anang ka-tandem nga si elected Vice governor Dexter Calizo.
Kaibahan man sanday elected representative Jess Marquez para sa first legislative district; ag ro uman nga nagbalik sa politika nga si Joeben Miraflores nga magabueos sa anang naka-engkwentru nga igkampod nga si Teodorico Haresco, para sa second legislative district.
Kaeakip pa sa naproklama hay ro mga bag-ong set it Sangguniang Panlalawigan members.
Para sa first district, kaibahan kara sanday Mark Ace Bautista , dating vice governor Atty Reynaldo Quimpo, Mark Quimpo, Teddy Tupas ag Apolinar Cleope, samtang ro naproklama para sa second district hay sanday Jose Haresco, Romeo Dalisay, Atty Bubi Legaspi, Bayani Cordova ag Jupiter Aelred Gallenero.
Sa 10 nga incoming SP members, pito ro re-electionists samtang tatlo ro first termer nga sanday Haresco, Atty Quimpo ag Atty Legaspi.
Kaeabanan sa mga nagdaog hay puro kandidato it local party nga Tibyog Akean.
Sa pihak nga parte, sa 17 nga pwesto sa pagka-mayor, 11 sa mga raya hay kaalyado it Tibyog Akean.
Ro mga newly elected mayors nga natigayon eon nga ma-proklama it andang natungdan nga mga Municipal Board of Canvassers hay sanday Denny Refol Sr. it Altavas; Prescilla Gale Calizo it Balete; Noel Redison it Banga; Mike Ramos it Batan; Allan Dagohoy it Buruanga; Juris Sucro it Kalibo; Miguel Miraflores it Ibajay; Meekia Icasas it Lezo; Vincent Navarosa it Libacao; Rex Gubatina it Madalag; Frolibar Bautista it Malay; Langkoy Mationg it Makato; Josephine Iquina it Malinao; James Solanoy it Nabas, Atty. Shimonette Francisco it New Washington; Ogie Enero it Numancia; ag Gene Fuentes it Tangalan.
Mataeupangdan nga ap-at sa mga nailihir nga alkalde hay babaye kun sa siin daywa sa mga raya hay first termer nga ginaeakipan nanday Calizo ag Icasas, sambilog ro reelectionist nga si Iquiña ag ro sambilog hay uman nga nagabalik bilang mayor it banwa nga si Atty Francisco.
