KALIBO, Aklan–Nabaton eon it mga nagdaeaog ro andang premyo sa gintinguhaan ag ginpangabudlayan nga pagpasakop sa “Sustainable Home Grown Food Project, Edible Garden Contest” it lokal nga gobyerno it Kalibo.
Suno kay Adorada Reynaldo, public services officer III it LGU Kalibo nga ko Hulyo 29, 2022 hay napasaalima eon it home edible garden contest winners ro andang premyo nga gindomina it Brgy. Tinigaw nga nagbaton ro mga raya it 10,000 pesos para sa first place; 7,000 pesos ro nabueo it 2nd place ag 5,000 pesos ro naangkon it 3rd place.
Samtang, sa communal garden contest hay naangkon it barangay Nalook ro unang pwesto nga nakabueo it premyo nga 20,000 pesos, barangay Andagao ro nagpangaywa nga nakabaton it 15,000 pesos ag nagpangatlo ro barangay Tinigaw nga nakaangkon man it 10,000 pesos bilang premyo.
Mag-eowas sa mga grand prize winners hay may nagdaog man it consolation prizes kaibahan eon ro pagpanupod kanda it mga seedlings it tinueaon ag kagamitan sa andang pagpananom.
Nasayuran nga tuyo it nasambit nga proyekto nga mapabaskog ro food security and nutrition sufficiency it banwa kamana man nga magiyahan ro mga pumueoyo sa pag-amlig sa palibot pinaagi sa tama nga pagpilak it basura.
Suporta man sigon raya sa programa it municipal solid waste management kun sa siin sambilog sa component kara hay ro paggamit it natural ukon organic nga pamaagi sa pagpatambok it tanum.
