Nakasugtanan sa plenaryo sa ginpadayon nga committee hearing it natungdan nga komitiba angot sa mga nagkaeain-eain nga problema sa pabaeay it National Housing Authority ukon NHA nga magpasa eon lang it resolution nga diretso sa taeatapan ni Pangueong Ferdinand Marcos Jr.
Suno kay Aklan first district board member Nemesio Neron, tuyo kara nga maimbestigahan sa pangkabilugan ro pila sa mga ginareklamo it occupants sa pabaeay it gobyerno.
Gusto sigon nanda nga makaangkon it kongretong sabat ro mga pumueoyo angot sa mga reklamo nga andang nabaton eabi eon ro mga nakatiwangwang pang mga units nga haeos mataeopangdan eon ro pagkasamad it mga raya bangud nga uwa it nagamintina.
Nasayuran nga iya sa probinsya it Aklan hay may pilang ka banwa nga gintukuran it pabaeay kon sa siin hasta sa makaron hay uwa gihapon raya naistaran bangud sa pila ka mga problema nga nakit-an.
