KALIBO,Aklan– Bilang pagdumdum sa kapistahan ni San Juan de Bautista, uman nga igabalik it lokal nga gobyerno it New Washington kabulig ro barangay council it Tambak, New Washington ro andang mga naka-andan nga mga aktibidad.
Suno kay Punong Barangay Lucille Macario it nasambit nga lugar nga pila sa mga raya hay ro bangkarera ukon karera it mga barotong de-makina ag may una man nga de-bugsay.
May pagahiwaton man nga aqua flash ukon pagsaeabyahan it tubi kaeakip ro iba pang mga aktibidad, apang raya hay iga-determine pa it andang municipal tourism office.
Gintinguhaan sigon makaron it LGU New Washington nga uman nga makapatigayon it mga aktibidad nga napundo haeos daywang dag-on eon ro nagtaliwan bangud sa pagtama it COVID-19 pandemic.
Nasayuran nga ro tambak hay sambilog sa mga ginadayo nga lugar it mga naga-excursion kada san juan bangud sa mahaba nga baybay, sikat nga taeaba ag mga aktibidad nga nakalinya nga nagatau it dugang nga kasadyahan.
Sa pihak nga parte, uman nga nagpadumdum si kapitan macario sa mga naga-excursion nga bawae ro pagpadaea it anuman nga klase it karneng baboy sa lugar, eaha man ukon hilaw.
Tuyo kara malikawan ro pagkalhit it african swine fever ukon ASF virus.
Agud nga malikawan sigon ro insidente it pagkaeumos, bantayan ro mga inunga nga nagapaligos ag limitahan ro pag inom it aeak ag kon pwede hay likawan ro debotelyang ilimnon para sa eowas nga selebrasyon it San Juan de Bautista
