KALIBO, Aklan—Gina-comply eon it Aklan Provincial Hospital ro mga nakitang deficiency sa ginatukod nga molecular testing laboratory.
Raya hay matapos ro ginpatigayon nga on-site visit sa pasilidad it mga representante it department of health, Research Institute for Tropical Medicine ukon RITM ag world health organization para sa validation ag assessment.
Suno kay Dr. Cornelio Cuatchon it Provincial Health Office nga sa makaron hay sa stage 3 pa eamang it 5-stage acreditation process ro pasilidad.
Posible man suno kana nga ro DOH hay magatau pa it dugang nga technical assistance ukon training antes nga eubusan nga maging haum sa andang operasyon.
Kaparte ro proficiency test it stage 4 accreditation.
Sa oras nga maging operational, ro Aklan hay makaangkon it kaugalingon nga laboratory para sa reverse transcription polymerase chain reaction (RT-PCR) testing nga makapaguwa it resulta pagkatapos it 24 oras.
Ginaeauman nga sa unang domingo it Agosto hay mabuksan eon ro COVID-19 testing laboratory.
