Kalibo Aklan ————Humampak eon sa kabilugang 1,941 katawo ro binawian it hueam nga kinabuhi samtang 9,900 nga iba pa ro naninahan kasunod iit magnitude 7.2 nga linog nga nag-uyog sa Haiti, limang adlaw eon ro nakataliwan.
Mag-eowas kara, ginpahayag ni Bombo International Correspondent Nee Fatima Sylvain it Haiti nga 13,000 ka mga pampublikong eskwelahan ro totally nga nahalitan it kalamidad kon sa siin magabukas eon kunta ro klase sa Setyembre 3 ukon 7, 2021.
Haeos 90 porsyento it mga kabaeayan, bangko ag establisyimento ro nasamad.
Nagakalisod ro mga pumueoyo bangud nga uwa it pagkaon ag malimpyo nga tubi nga mainom bangud nga haeos tanan man nga water service system hay naapektuhan.
Uwa it suplay it kuryente rason nga inde man makontak it mga pumueoyo ro andang mga himata agud nga maayudahan sanda.
Suno pa kay Sylvain, kon inde mag-improvised it eskwelahan ro Haiti government hay uwa it matabo nga klase makaron nga school year.
Kaangot kara, insigidang nag-ayuda ro USA, Cuban ag Chile government kon sa siin nagpadaea ro mga raya it medical team, potable water ag maging pagkaon it mga apektadong pumueoyo.
Mag-eowas kara, nag-umpisa eon man ro filipino community it andang donation drive agud nga makabulig sa apektadong pamilya.
Ro nasyon it Haiti hay prone sa mga kalamidad kon sa siin ko 2010 hay nakaeksperyensya man sanda it mabaskog nga linog.
