Nag-abot eon sa masobra sa 100 ro namatay ag masobra sa 390 nga iba pa ro ginadudahan nga may kaso it Ebola sa Democratic Republic of Congo (DRC).
Raya ro ginpahayag it Africa Centres for Disease Control and Prevention.
Nakalista eon man it kaso it virus sa kaiping nga nasyong Uganda, kun sa siin daywa ro kumpirmadong kaso ag sambilog ro namatay.
Kaibahan sa mga kumpirmadong natapnan hay sangka Amerikanong doktor sa DRC, nga pagadaehon sa Germany para sa nagakaigo nga pagbueong.
Ginreport pa nga pilang Amerikano ro posibleng na-expose sa virus nga presenteng ginabuligan it gobyerno it Estados Unidos.
Nauna eon nga gindeklara it World Health Organization (WHO) ro outbreak bilang public health emergency of international concern apang maeayo nga maging pandemic. Sa atubang kara, ginpaandam ro hugut nga pagsunod sa mga patakaran, eabi eon sa pag-eubong sa mga namatay bangud sa mataas nga peligro nga magkalhit ro virus.
Nagpatuman man it border screening ro mga kaiping nga nasyon it Rwanda ag Nigeria bilang tikang sa paglikaw sa virus.
Suno sa US Centers for Disease Control and Prevention (CDC), manaba ro peligro kara sa Amerika apang andang gina-monitor ro mga biyahero halin sa apektadong lugar nga nag-abot sa U.S.
Mag-eowas kara hay nagpaguwa man ro Estados Unidos it Level 4 travel advisory, ro pinakamataas nga paandam kontra sa pag-agto sa DRC.
Sa makaron, owa pa it aprubadong bueong ukon bakuna kontra sa Bundibugyo strain it Ebola, rason nga nagapanawagan ro Africa CDC ag WHO sa publiko nga sundon ro mga protocol ag pabaskugon ro surveillance sa komunidad agud nga mapugngan ro pagkalhit it virus.
