KALIBO, Aklan — Gina-usuyan pa it masayluhan it lokal nga gobyerno it Kalibo ro mga vendors nga nasunugan it puwesto sa Kalibo Public Market ko Setyembre 15 it aga-aga.
Naga-abot sa 276 nga puwesto ro nasamad sa sunog ukon haeos 80 porsiyento it tindahan.
Suno kay Engr. Jessie Figarido, head it Municipal Economic Enterprise Development Office (MEEDO)-Kalibo ginaproponer nanda nga relocation site ro San Lorenzo Drive sa may terminal area sa Eastern side ukon sa bakanteng lote sa kilid it nagsaradong Ang Pue Hardware and Lumber maeapit sa tindahan.
Owa sigon nanda ginpaburan ro suhestiyon it pilang vendors nga makabaligya sa tabok it nasunog nga tindahan sa Toting Reyes St. samtang owa pa it pagasayluhan kanda tuga it mandu ni Pangueong Rodrigo Duterte nga limpyuhan ro mga sidewalk sa anuman nga sagabal.
Nasayuran nga padayun nga nagabaligya sa sueod it tindahan ro mga fish, meat ag iba pang vegetable vendors.
Nakaangkon it dayalogo sa mga vendors, ko Lunes nga gintambungan it LGU-Kalibo, Bureau of Fire Protection ag iba pang natungdan nga ahensiya it gobyerno.
Ginpasiguro man it LGU-Kalibo nga pagabuligan ro mga vendors agud nga mapahagan-hagan ro kalisod nga andang nabatyagan.
Samtang, gintugyan ni Engr. Figarido sa Sangguniang Bayan it Kalibo ro paghimo it resolution agud nga mapaiway anay ukon mapanabaan ro ginabayaran nga stalls it mga apektadong negosyante.
Mag-eowas kara, igaduso eon sigon ro planong pagtukod it standard nga public market sa lugar.
Sa pihak nga parte, posibleng abuton pa it daywa hasta tatlong buean antes nga eubusan nga matapos ro imbestigasyon it fire authorities sa kabangdanan ag ginhalinan it sunog.
Nakalista it initial nga P35-million nga danyos sa insidente. Sa mayad nga swerte hay owa it napabalitang namatay ukon naninahan.
Nauna eon nga ginpamalibaran it LGU-Kalibo nga ginhungod ro pagkasunog it tindahan nga nasunog man ko 1998 ag 2003.
