KALIBO, Aklan–Nagapadayun ro imbestigasyon it mga otoridad sa natabu nga back-to-back nga mass shootings sa California nga pumatay it maabu nga tawo nga nagakinasadya ag nagasinaot sa studio sa Monterey Park ag farm workers sa sangka coastal community sa Half Moon Bay.
Suno kay Bombo International Correspondent Gary Boyd nga 11 nga katawo ro patay kat magpauean it bala ro sangka 72 anyos nga gunman kadungan sa selebrasyon it Lunar New Year sa Star Ballroom Dance Studio sa Monterey Park sa Los Angeles.
Kaeabanan nga Chinese citizens ro namatay ag may daywang Taiwanese expatriates.
Samtang sangka Filipino senior citizen ro kaibahan pa sa namatay nga nakilaea kay valentino alvero, 68 anyos.
Grabeng selos ro sambilog sa mga ginapanan-aw nga motibo it otoridad sa natabu nga insidente.
Ko ulihi ro suspek hay nakita nga patay sa sangka van matapos nga magbaril sa kaugalingon.
Sa pihak nga parte, pitong katawo ro patay ag sambilog ro kritikal matapos nga ro 66 anyos nga suspek hay nagpamaril sa anang mga katrabaho sa sangka mushroom farms maeapit sa resort town it Half Moon Bay, sa San Francisco.
Nakataeanang maga-atubang ro suspek sa korte sa Lunes nga adlaw.
