KALIBO, Aklan—Nagpaabot it andang pagkadismaya ro grupo it mga negosyante bangud sa uman nga pagpatag-od sa operating hours it mga business establishment sa bilog nga probinsya it Aklan.
Suno kay Ramel Buncalan, board of director it Philippine Chamber of Commerce and Industry ukon PCCI-Aklan nga makaeoeooy eamang ro mga negosyante nga nagasalig sa andang ginakita sa gabi-e.
Gin-insister pa kara nga mingko owa eamang it natabong pagbag-o sa pag-eatag it mga soeondanan apisar nga mataas man ro porsiyento it mga pomoeuyo nga bakunado eun kontra sa covid-19.
Kanugon eamang sigon ro vaccination drive bangud nagabalik man gihapon sa dating sitwasyon.
Nasayuran nga sa makarun hay hasta eun lang it alas-8 it gabi-e ro operasyon it mga negosyo sa probinsya sandig sa ginpaguwa nga Executive Order ni Aklan Governor Florencio Miraflores
Sa pihak nga parte, ginpaboran man it militanteng grupo ro hinanaing it mga negosyante sa probinsya angot sa pagpatag-od pa it operasyon it mga business establishment.
Suno kay Kim Sin Tugn, provincial coordinator it Bagong Alyansang Makabayan ukon Bayan-Aklan nga ro nasambitan nga tikang it gobyerno hay nagapatay eamang sa ekonomiya.
