KALIBO, Aklan—Nagpadaea it sangka “opinion letter” ro opisina it Municipal Planning Development Office (MPDO) sa lokal nga gobyerno it Kalibo.
Raya hay may kaangtanan sa rekomendasyon it mga miyembro it Sangguniang Bayan nga magpatuman it “No Movement Sunday” sa banwa it Kalibo.
Suno kay Engr. Marlo Villanueva it MPDO nga mabahoe ro magiging epekto kara sa ekonomiya it banwa bilang sentro it komersyo sa bilog nga probinsya it Aklan kamana man nga maabo nga mga transaksyon nga ginapatigayun kara.
Indi sigon dapat pagbalewalaon ro kalisod it mga apektadong sector partikular ro mga vendors, negosyante ag ro kita it pampublikong transportasyon.
Sa baylo hay balansehon sigon ro sitwasyon ag bukon it puro eamang pag-instrikto ro ipatuman.
Dugang pa kara nga ro sang adlaw nga pagpatuman it no movement kada dominggo hay mabahoe nga kawad-an bukon eamang sa ekonomiya it lokal nga gobyerno kundi maskin sa mga nagapanag-iya it negosyo.
Sa kamatuoran suno kana hay nagpatigayun sanda it pag-estudyo sa kung pila ro maduea nga kita sa mga apektadong industriya.
Madumduman nga nauna eon nga nagpatuman it “No Movement Sunday” ro mga banwa it Banga, Malinao, Ibajay ag Tangalan.
Sa pihak nga parte, nagpaabot man it pag-oponer ro grupo it Bagong Alyansang Makabayan ukon Bayan-Aklan sa ginaduso it pilang mga Sangguniang Bayan member nga No Movement Sunday sa banwa it Kalibo.
Ginpahayag ni Mr. Kim Sin Tugna it Bayan-Aklan nga dugang eamang nga pasakit ag kabudlay sa parehong negosyante ag pumueoyo ro pagproponer it nasambit nga tikang.
Magatuga eamang sigon raya it mas pang pagbagsak it ekonomiya ag gutom sa pamilya it mga maintok nga negosyante.
