Nagpanawagan ro grupo it mga negosyante sa probinsiya it aklan sa gobyerno nga maghimo eon it nagakaigo nga tikang agud nga masolusyunan ro krisis sa enerhiya sa nasyon.
Suno kay Ramil Buncalan, presidente it Kalibo Consumers Association nga bukon eamang ro aklan ag bilog nga Western Visayas ro nakakaexperiensiya it patay-sindi nga supply it kuryente kundi nga bilog nga nasyon.
Agud suno kana nga malikawan ro krisis, dapat eon nga isueong it gobyerno ro uman nga pagbuhi sa nuclear power plant sa Bataan ag pag angkon it iba pang alternatibong power sources.
Sa mayad nga swerte suno kana nga may una eon nga ginatukod nga renewable power source nga ginaeakipan it hydropower plant sa banwa it madalag ag wind power sa banwa it Nabas.
Pigado sigon ro mga power producer sa pilipinas rason nga manipis ro supply it kuryente.
Nagatinaas sigon ro demand it nasyon sa kuryente eabi eon kon tig-ilinit.
Apang owa nagadugang ro power sources nga nagaresulta sa shortage dugang pa ro naobserbahan nga owa it nagakaigo nga maintenance.
Sa pihak nga parte, aminado si Buncalan nga mabahoe ro epekto it patay sindi nga supply it kuryente sa ekonomiya it probinsiya eabi eon sa isla it Boracay.
Maskin suno kana nga may ikasarang ro pilang establisimento komersiyal nga magbakae it mga generator sets , apang raya hay dugang nga gastos sa andang operasyon.
Apela nana nga indi eon pagpabuhayon ro problema agud nga indi maga antus ro parehong publiko ag mga negosyante .
