KALIBO, Aklan—Ginakabaeak-an nga maabu pang negosyo ro magasarado sa isla it Boracay bangud sa mga ginapatuman nga lockdown ukon community quarantine daea it COVID-19 pandemic.
Sa interview it Bombo Radyo Kalibo, ginpahayag ni Edwin Raymundo, presidente it Boracay Foundation Incorporated (BFI), grupo it mga negosyante sa isla nga haeos 100 porsiyento eon nga lugi ro andang mga negosyo.
Kapareho sigon it anang hotel ag restaurant nga temporaryong ginpasarado bangud apektado it ginapatuman nga surgical lockdown sa Barangay Manocmanoc bangud sa pagtaas it kaso it deadly virus.
Nauna kara, dismayado man sigon ro kaabuan sa mga negosyante ag trabahador kat uman nga magpatuman it Enhanced Community Quarantine (ECQ) sa Metro Manila ag kaiping nga probinsiya sang domingo antes ro Semana Santa.
Ginaeauman kunta nanda nga makabawi eon bangud sa mataas nga numero it mga nagpa-book nga turista nga puro taga NCR.
Apang ginpatuman ro NCR Plus bubble.
Kaabuan sigon kanda hay owa pa nakasayod kon hin-uno makabalik bangud sa mabahoe nga pagkalugi.
