KALIBO, Aklan–Sa pihak nga nagbalik eon ro kapagsik it industriya sa isla it Boracay, apang kaabuan sa mga negosyante hay owa pa eubusan nga nakabangon halin sa epekto it covid 19 pandemic.
Suno kay dating Philippine Chamber of Commerce and Industry ukon PCCI-Boracay president Elena Brugger ginaeauman nga sa 2024 pa sanda makabawi base man sa projection it Department of Tourism.
Ro ginakita sigon it mga negosyante makaron hay tama eamang nga pangsweldo sa andang mga empleyado, bayad sa mga bill ag iba pang mga gaeastuson.
Puro mga domestic tourist ag expats ro nagabakasyon sa isla ag owa pa ro mga dating top foreign tourist market kapareho it South Korea ag China.
Samtang, ginaeauman ni Brugger nga maganaba eon ro numero it mga turista nga magabakasyon matapos nga ideklara it PAGASA ro pagsueod it rainy season sa nasyon.
Apang mabahoe nga bulig sigon kanda ro pagbuhos it mga turista ko buean it abril ag unang parte it Mayo.
Sa pihak nga parte, suportado it mga hotel and resort owners ro proposisyon it lokal nga gobyerno it malay nga “100 tourist, 100 trees”.
Sa makaron hay ginahueat eon sigon nanda ro kaundan it paga-aprubahan nga proposed ordinance.
