KALIBO, Aklan—Paamat-amat hay nagabawi ro mga negosyante sa isla it Boracay sa naluging negosyo tuga it global public crisis nga coronavirus disease ukon Covid-19 pandemic sa nagapadayon nga epekto kara sa turismo halin pa ko buean it Marso.
Kasunod raya sa sangkiring pagtaas it tourist arrival sa unang dominggo it Nobyembre 1-9, 2020 nga umabot sa 866 tourist.
Sa pihak nga ginhaeogaan ro travel restriction paadto sa probinsya it Aklan sa uman nga pagbukas it Boracay hay may mga turista gihapon nga naga-aeang-aeang nga magtabok sa isla bangud sa requirement nga negatibong resulta it Reverse Transcription Polymerase Chain Reaction ukon RTPCR test.
Bangud kara, ginpahayag ni Malay mayor Frolibar Bautista nga nagahinyo sanda sa Boracay Inter-Agency Task Force ag sa Inter-Agency Task Force for the Management of Emerging Infectious Diseases (IATF-EID) nga dueaon eon ro Covid-19 test requirement bangud dugang gastos eamang raya para sa mga gustong magbakasyon sa Boracay.
Naga-usoy eon lang sigon it pamaagi ro mga negosyante agud magpabiling nakatindog ro andang negosyo hasta sa daeayong maayos ro sitwasyon sa sektor it turismo.
