KALIBO, Aklan—Naga-apela makaron sa gobyerno ro mga negosyante sa Boracay nga imbes nga Reverse Transcription Polymerase Chain Reaction ukon RT-PCR test hay maggamit eon lang it antigen test bilang requirements sa mga turista antes nga makasueod sa isla.
Raya hay bangud nga kaabuan sigon sa mga bisita hay nagkansela it andang bookings bangud sa kabudlay ag kamahae nga swab test, kun sa siin obligado sanda nga magpakita kara it andang negatibong resulta 48 oras antes ro andang bakasyon.
Mag-eowas kara , owa sigon ginataw-an it konsiderasyon kon mag-expire ro 48 oras ag kinahangean nanda nga magbo-oe it bag-o.
Suno sa mga hotel ag resort owners nga mas barato ag madasig ro COVID-19 test para sa mga turista, kun sa siin maskin sa airport patigayunon ro test hay pwede ag mabo-oe eagi ro resulta pagkataliwan it 15 hasta 30 minutos.
Nasayuran nga ro RT-PCRT testing hay nagabalor it haeos P4,000 pesos sa Western Visayas.
Gindugang pa it mga negosyante nga dapat nga indi masyadong pabudlayan ro mga turista sa pihak nga bukon man it masyadong importante ro pagbakasyon makaron nga may pandemya tuga it covid 19 bangud nga magiging owa it pueos ro katuyuan it pagbukas it lokal nga turismo bangud nga kaabuan sa mga raya hay maga-back-out eon lang.
Angot kara, nag-apela ro gobyerno nga habaan pa it mga negosyante sa Boracay ro andang pasensiya ag pag-intindi.
Ginpahayag ni Presidential Spokesperson Harry Roque nga naintindihan nana ro andang sitwasyon, apang kinahangean sigon nga isipon ro proteksyon ag ikamayad nga eawas it mga pumueuyu sa isla.
Kinahangean sigon nga hueaton ro resulta it nagapadayun nga pilot antigen testing.
Sa oras suno kana nga madeklarang eowas ro paggamit kara sa tourism purposes, siguradong pagagamiton man raya sa iba pang mga tourist destination sa nasyon kapareho it Boracay.
