Kalibo Aklan ——-Nag-apela ro mga negosyante sa Isla it Boracay it ayuda para sa andang mga empleyado nga naduea-an it trabaho matapos nga bumagsak ro tourist arrivals tuga it coronavirus disease (COVID-19).
Suno kay Nenette Aguirre Graf, sangka negosyante ag presenteng Sangguniang Bayan Member it Malay nga haeos 30 porsiyento eamang it mga empleyado sa Isla ro nataw-an it cash aid halin sa COVID-19 Adjustment Measures Program (CAMP) ag Tulong Panghanapbuhay sa Displaced/Disadvantaged Workers, Barangay Ko Bahay Ko (TUPAD BKBK) it Department of Labor and Employment (DOLE).
Kaabuan sigon sa mga empleyado sa tourism establishment hay gin-abisuhang magpatigayon it leave without pay kasunod it pagsarado it operasyon.
Nagaeaum imaw nga makatau it pautang nga may manaba nga interest ro gobyerno sa uman nga pagbangon it mga negosyante .
Sa pihak nga parte, sigidas man sigon ro pagtau it relief goods it LGU-Malay sa mga residente nga naapektuhan man ro pangabuhian nga nakasandig sa turismo.
Ginbuligan man sigon ni Malay Mayor Frolibar ro mga stranded nga mga workers ag mga naga-OJT nga mga estudyante sa Boracay nga makabalik sa andang natungdan nga mga lugar basta nga makakompleto it mga kinahangeanon nga dokumento.
Samtang, sambilog sigon sa kamaeayran nga gintuga it lockdown sa Isla hay ro pagbalik it anang dating kaanyag.
Maskin suno kana ro mga insekto nga mabuhay eon nga naduea sa Isla hay uman nga nagpakita.
Gin-insister pa kara nga kada summer hay kaeabanan gid man nga nagaguwa ro eumot nga makabig eon nga kaparte it Boracay.
Makaron nga tyempo suno kana it pandemic hay magpananum eon lang anay agud nga maskin paalin hay may paga-eahaon.
